Uzun Aradan Sonra

Strangers/Yadlar

Salam. Upuzun aradan sonra yenidən yazmaq istəyiylə başlayıram yazıya. Ancaq blog da, hər işimiz də özlüyündə elə insanlara bənzəyir. Blogu yazmağı, oxunmağını və heç tanımadığım insanların fikirlərini oxumağı sevirəm. Yazılarıma gələn fikirlər və kiçik söhbətləri də sevirəm. Bu həm çox yaxşı tanıdığın həm də heç tanımadığın dostunla vaxt keçirməyə bənzəyir. 

Vaxtınızın çoxunu 1 insanla keçirdiyinizi düşünün. Sonra birdən müxtəlif milyon səbəbdən 1-i məhz sizin rastınıza çıxanına görə bu insanla uzaqlaşırsınız. Bu sevgi, dost, qonşunuz və ağlınıza oxuduğunuz an gələcək ilk insanın elə özüdür. Yenidən səbəblər aradan qalxır və siz həmin insanla görüşürsünüz. Amma nəsə yolunda deyil. İlk andan bu hissi qova bilmirsiniz. Bu insanla söhbətə can atan hissinizə baxmayaraq eyni zamanda çox güclü 1 qopma hiss edirsiniz. Həm deyəsi çox sözünüz var, həm də ağzınızı hər açanda nədənsə heç də lazım olan kəlmələr gəlmir. Həmişə soyuq, qoruyucu və mehribanmış kimi göstərməyə çalışılma hissi sizdən əl çəkmir. Nəsə düz deyil ancaq nə? 

Uzun müddətli uzaqlaşılan insanlar haqdakı qarşınıza çıxan milyon cümlənin hər biri indi özlüyündə sizə daha mənalı gəlir. Siz onu yaşayırsınız. Qarşınızdakı insan keçmişdən gələn çox doğma xatirələrinizi yada salır. Ancaq o an anlayırsınız ki bu insan sizin üçün artıq tam da köhnə tanış olub. Yəni daha aydın və uyğun söz isə YAD -dır. Siz danışa bilmirdiniz çünki onu məhz indiki onu tanımırsınız. Bunu isə çox lap dərindəki düşüncələriniz sizə deyirdi. Bu hissin yadlıq hissinin qarşılıqlı olması isə vəziyyəti daha çətin ya da bəlkə də daha asan hala salır. Ona görə çətin ki, yenidən söhbətə başlamaq və eyni yaxınlıq, doğmalığı qazanmaq çox ağır yük kimi hiss etdirir. Asanlığı isə budur ki, siz asanlıqla hər şeyi geridə qoyub unuda bilərsiniz. Beyninizdə bu insanın yeri hər hansı çox sevdiyiniz filmlə eyni rəfə girən xatirəyə çevrilər. 

Yenə mən bloqa yazmağın necə hiss etdirdiyini sizə fərqli tərzdə yazdım. Həmişə mənim nümunələrim bu cür fərqli olur. Belə, bura qədər oxuyub gəldinizsə istəyimi sizlə bölüşə bilərəm. Mənə bloga yenidən yazmağıma dəstək olucu, yadlaşmadan burda yazılarımı oxuya biləcək rəyiniz (comment/yorum) lazımdır. 

Qısa qeyd: Əslində çox dinlədiyim və hədsiz sevdiyim mahnılar paylaşmaq istəmişdim. Amma olmadı. Sanki çox gizli və çox dəyərli olduqlarını hiss etdim. İndi isə mənə siz öz Ən çox hiss edərək dinlədiyiniz mahnının və bu aralar dinlədiyiniz mahnının adını yazsanız möhtəşəm bir şey etmi olarsınız. 

Bu yazını bu mahnı sədaları altında gecə 4 radələrində səssiz şəhərin sükutunu arada pozan maşın səslərinin müşayiəti ilə yazdım. Sevərək oxumağınız ümidi ilə fikirlərinizi gözləyəcəm. 

Bloggerlik

  Blog və problemlərim.

Əvvəla uzun zamandır yaza bilməmə səbəbim haqda xüsusilə yazmalıyam. Təsadüfən bəyənərək pulsuz şablon (theme) yükləmişdim bloguma və uzun müddət də heç bir problem olmamışdı. Ancaq bir gün bloga google dan girməyə çalışanda blogumun google tərəfindən təhlükəli saytlar siyahısına daxil olunduğunu gördüm. Bəlkə də siz də o vaxtlar bunu görmüsünüz. Renklitirtil blog adli Zühal dadıma yetişdi. Bağlanma təhlükəsi olan blogun probleminin məhz neçə müddətdir problem yaratmayan şablon linki olduğunu bilmirdim. Blogu başqa linkə yönləndirirmiş. Bu xoşagəlməz hadisə sayəsində bloggerliyin dost qazandırdığını bir daha görmüş oldum. Bir müddət bloqumdan işlərimlə əlaqədar ayrı qalıb yazmağa vaxt tapmadığım müddət ərzində blogun bağlanma təhlükəsi mənə çox pis təsir etmişdi. Nəhayət Zühalın köməyi ilə blogumu geri gətirə bildim. Nəhayət yaz-yay ayları da gəlir. Yenə yazılarımla gələcəm. Ümidvaram oxuyub zövq alarsınız.  

Yolun sonunda nə var?

2həftəlik ömrünüz qalsa nə edərdiniz? 

Məsələn sevdiyimiz filmdə klassik bir şey baş verir. Sevdiyimiz qəhrəman həkimə gedir sonra həkim səhvən analizləri dəyişik salır və tanıdığımız baş roldakı adam xəstə olduğunu və tezliklə öləcəyini öyrənir. Biz də o an həmin obrazla birlikdə hadisənin əslini bilmirik. Və çox kədərlənirik. Onun ölməməsi üçün bəlkə dua edən də olur. Nəticədə sonda məlum olur hər şey. Balaca bir səhv olub analiz əslində başqasına aidmiş. Və bizim o an sevincimizin həddi olmur. Demək olar hər birimiz yaşamışıq bunu. Əslində biz başqa biri tanımadığımız biri öldü deyə sevinirik. Biz bu qədər kiçik düşünürük. Çünki bizə o an yalnız sevdiyimiz baş qəhrəmanın sağ qalması önəmlidir. Bu qeder egoist canlıyıq. Gəlin ən rahat yoldan gedək. Içinizi ən çox sakitləşdirəcək yol hələ də var. O məhz bu cümlədir: " Bu dünyanın sistemidir. Daha güclü daha zəifi əzir keçir." Və onlar haqqında düşünmürük. Beləcə daha sakit vicdanla yaşayarıq. Nəysə bu yazı da belə keçdi tarixə.
42.bölüm "7numara" izləyin.

Elcernon üçün çiçəklər/Flowers for Algernon

Ən yaxşı insan axmadır, yoxsa axmaq ən yaxşı insandır?

məhz bu üz qabığı kitabın ən sevdiyim və ən mənalı üz qabığıdır.

  Kitabı bitirən kimi onun təəssüratları təzə ikən bu yazını yazmaq istədim. Əslində siz bu yazını oxumadan da sadəcə kitabı alıb oxuya bilərsiniz. Hətta belə çox daha maraqlı olar. (Əlbəttə əgər hələ də kitabın mövzusundan xəbəriniz yoxdursa) XX əsrin ikinci yarsında işıq üzü görmüş kitab mənim bir neçə ildir ki, hər yerdə  rastıma çıxır. Daha aydın desəm "Kürk paltolu madonna" nı hər yerdə əvvəlcədən sözləşmiş kimi müxtəlif insanların əlində gördüyüm kimi bu kitab da nisbətən həmin tipdə son zamanlar məhşurlaşıb. (təbii ki şəxsi fikrimdir).

Yazıçı Daniel Keyes in ən məhşur əsəridir. Amerikalı yazıçı ilk olaraq mövzunu qısa hekayə olaraq 1958-ci ildə yazıb. 1959-cu ildə isə elmi fantastik jurnalda kiçik hekayə yayımlanır. Hekayənin uğurundan sonra 1966-cı ildə kitab çap olunur. 

Bu üz qabığı isə mənim kitabımındır.

Əslində öz oxuduğum kitabın üz qabığına görə çox da maraqlı gəlməzdi almazdım. Kitabın içini nəzərə alsaq bu üz qabığı uşaq kitabını və ya romantik kitabı xatırladır. Bu romanın sadəcə adi romantik olduğunu düşünmürəm.

   Romanın mövzusu haqqında mümkün qədər qısa yazmağa çalışacam. Bütün insanların hüququ bərabərdir. Yalnız üzərinizdə işləməklə, həyatda daha çox nailiyyətlər əldə edə bilərsiniz və bu da çox ədalətli yoldur. Ancaq bəzi insanlar həyata eyni bacarıqlarla başlamır. Romanda əsas qəhrəmanımız əqli cəhətdən geri qalmış (əqli qüsurlu) Çarli Qordondur. Onun həyatı ürəyincədir. İşi var, dostları var və yeganə arzusu hamı kimi ağıllı olmaqdır. O bunun üçün özü kimi insanlar üçün nəzərdə tutulmuş axşam məktəbinə gedir. Orada yazmağı və oxumağı öyrənməyə çaılışır. O sinifdəki ən çalışqan və ən həvəsli adamdır. Keçmişi və ailəsi haqqında demək olar heç nə xatırlamır. Yalnız qısa dumanlı xatirələr var. Təsadüf nəticəsində o üzərində təcrübə xarakterli onun əqli qabiliyyətini inkişaf etdirəcək əməliyyat üçün seçilən ilk insan olur. Əməliyyat uğurlu keçsə o hamı kimi ola biləcək. Romanda biz yaşadığı dünyaya 2Çarlinin gözü ilə baxırıq. Əqli qüsurlu Çarli 30lu yaşlarında olsa da balaca uşaq kimidir. Dünyanı da elə uşağın gözləriylə görür. Biz ilk kitabda hər şeyi məhz həmin Çarlinin gözləriylə görürük. Çarli olduqca yaxşı, xeyirxah insandır. Əməliyyatdan sonrakı Çarlinin gördüyü dünya isə zaman zaman sizi təəccübləndirəcək, kədərləndirəcək və düşündürəcək. Çarli üçün əməliyyatdan sonra dünya özü dəyişəcək. Biz isə kitabın hər səhifəsində onun tədricən gedən inkişafını və onda olan dəyişiklikləri oxuyacayıq. Əvvəlcə ona kəmağıl kimi baxırdılar. İndi isə o həddindən artıq inkişaf etmişdir və güclü intellekti var. Cəmiyyətin fərqli münasibəti və Çarlinin özünün düşüncələrindəki dəyişikliklərin şahidi olacaqsınız. Çarli təkcə daha ağıllı olmur, o həm də şəxsiyyət, bir fərd kimi inkişaf edir və dəyişir. Siz kitabı oxuyarkən onunla birlikdə bunu hiss edəcəksiniz. Məhz bütün bunları oxuduğunuz zaman zövq alacaqsınız. 

Roman əsasında bir neçə film çəkilib. Kitabını oxuduqdan sonra məncə ilk olaraq elə 1968-ci ildə çəkilmiş filmi izləmək olar. Məndən sizə məsləhət kitabı oxumamış kitab əsasında çəkilmiş filmmi izləməyin. Hətta filmin afişasına belə baxmayın. Kitabın baş qəhrəmanını təxəyyülünüzdə özünüz canlandırın. Hansısa aktyor ağlınıza gələndə həmişə kitab daha az cəlbedici olur. Ən azı mənə görə elədir. Ancaq 1968-ci ildə çəkilmiş filmdə üzlər görünmür deyə xüsusilə paylaşmaq istəyirəm. Filmin adı romanla eyni deyil. Filmin adı "Charly"/CHAЯLY (Çarli) dir. Filmin adı elə qəhrəmanımızın öz adını yazdığı kimi təqdim olunur. Tərsinə yazılmış R hərfi ilə. 

Romanın əsasında müxtəlif filmlər, tamaşalar, musical/myuzikl, seriallar çəkilib. Xüsusilə seçilənlər sırasında isə fransız filmi "Des fleurs pour Algernon" (2006-ci il) filmi var. Xüsusilə diqqətimi çəkən isə yaponların roman əsasında fərqli illərdə 2 serial (Yapon draması) çəkməsi oldu. "Algernon ni Hanataba wo" (romanın adının yaponcası) 2015-ci ildəki mini serialda baş rolda aktyor, müğənni Tomohisa Yamashita (səhnə adıyla Yamapi) oynayıb. 

Kitab haqqında oxumayanları nəzərə alıb sadəcə spoi-siz qısa məlumat yazdım. Ancaq kitabdakı bir sözü paylaşmaya bilməzdim. İngiliscədən düzgün tərcümə olunmayan sözün altından qara xətt çəkmişəm. Hərfi tərcümə edilib. Əslində isə serial sözü düzgün tərcümə olardı. Kitabın son səhifələrindən olduğunu nəzərə alsaq kitabı oxumayanlara xəbərdarlıq edim ki, məhz səhifəni oxumayın. 

Sonda isə başlıqdakı cümləni sual kimə yazını oxuyan sənə ünvanlayıram. Ən yaxşı insan məhz yaxşı olmağa çalışdığı üçün axmaqdır? Ya əvvəlcədən elə axmaq adam məhz ən yaxşı adamdır? Suala bir neçə tərəfdən baxmaq olar. Tərəfinizi seçin və fikriniz bölüşün. 

Sofar Baku concert/Sofar Bakı konserti

Musiqi..

Həmin gündən xatirə şəkil.

Yayın sonunu məhz Sofar Bakı konserti ilə yekunlaşdırmaq- Bunu çox sevdim. Əslində Sofar haqqında elə ilk yazımda həm Sofarın öz tarixçəsi haqqında kiçik məlumat yazmaq, həm də Sofar Bakının son konserti barəsində və həmin konsertdən necə zövq aldığımı sizinlə paylaşmaq istəmişdim. Ancaq özlüyündə bir cümləyə belə güclə sığan məlumat və hisslərimi 1cə yazıya sığdırmaq çətin olardı. Sofar Bakıya əvvəllər heç vaxt dinləyici olmaq üçün qeydiyyatdan keçmirdim. Düşünürdüm ki, şansım gətirməz. Əvvəlki yazımı oxumusunuzsa dinləyicilərin təsadüfi yolla seçildiyini bilirsiniz (oxumayanlar geriyə qayıdıb əsas səhifədən oxuyub gəlsə çox mu şey istədim?) 

SofarBaku-dan həmin o mail.

25 avqust- konsertdən 1 gün əvvəl həmin mail(meyl) gəldi. İlk görəndə inanmadım və SofarBaku instaqram səhifəsinə baxdım. Orda mail-lərinizi yoxlayın mesajını gördüm və əla. Seçilən dinləyicilərə aşağıdakı kimi bir mesaj gəlir. Konsertin yeri, performerlər bir gün əvvəldən və yalnız seçilən dinləyicilərə mail-də göndərilir. Çıxış 5 performer seçilib ki, bu da konsertin uzun olacağı demək idi. Konsertin məkanı isə Lunapark idi. Lunaparkda yere salınmış palazların üstündə oturub canlı musiqi dinləmək mənim üçün unudulmaz xatirə olaraq qalacaq. Konsertdə özümə səhnəyə yaxın yer seçdim, çünki qarşıda kiminsə söhbəti və sair. mənimlə səhnə və musiqi arasına girsin istəmirdim. 
Beləliklə konsert mail-də qeyd olunduğu kimi Vedad-ın çıxışı ilə başladı. İfaçı özü arada zarafatlar edərək, dinləyicilərin əhvalını musiqiyə hazırladı. Ümumilikdə yaxşı danışmağı bacaran, özünəinamlı insan təəssüratı bağışladı. İlk olaraq xalq mahnımız "Sarı gəlin"-i ifa etdi. Bu mahnını məncə sevməyən yoxdur. Sonra ifaçı dünyasını dəyişən xalasına mahnı həsr edib ifa etdi. Daha sonra oxuduğu mahnıları da müğənnin youtube kanalından bura əlavə edirəm.

Son olaraq isə müğənni Nigar ilə duet oxudular. Bu da maraqlı mahnı idi. Mən bəyəndim. Açığı bir az ifaçılardan Nigarın səsində ya ifasında izah edə bilmədiyim əksiklik hiss edirəm. Bu fikir xüsusilə mahnının əvvəllərində olur, sonlarına doğqu sanki hər şey normaldır. Hər halda bu mənim şəxsi fikrimdir. Vedad-da isə özünün də dediyi kimi Müslüm Maqomayev sənətindən bəhrələnib. Bundan əlavə mən ilk gördüyüm və səsini eşitdiyim andan nədənsə ağlıma Marilyn Manson gəldi. 

Bu çıxışdan sonra isə son zamanlar xüsusilə "Ey Gözəl" mahnısı ilə seçilən qrup The Half -ın sırası idi. 

Əvvəlcə qrupun məhz bu mahnısını çox sevdiyimi qeyd etməliyəm. Klip olaraq isə qrup keçən əsrin sonlarından çox maraqlı filmdən kadrları seçiblər. Mahnını daha uğurlu edən səbəblərdən biri də düşünürəm ki, məhz bu seçimdir. Klipi unutmaq məncə mümkün olmayacaq. 

konsertdən çəkdiyim şəkillərdən biri.

Təəssüf ki konsertdən daha çox şəkil çəkə bilmədim. Daha çox canlı musiqi dinləməklə məşğul idim. The Half rock (rok) qrupunun digər mahnılarını da canlı dinlədik. Yenə də canlı ifanı Sofar bakı-nın öz youtube kanallarına yerləşdirəcəkləri günü gözləyək. Canlı çıxışda qrupun bütün mahnılarını sevdim. Ümumilikdə həmin konsertdən bütün çıxışları Sofar Bakı-nın youtube kanalında paylaşmasını gözləyirəm. Həmin günü və musiqidən  zövq aldığım anları yenidən hiss etmək xoş olardı. Aşağıfakı paylaşdığım mahnının- "Neyniyim Qardaş"- canlı ifasını daha çox bəyəndim.

Digər mahnı "Sərxoş Qadın" mahnısı daha çox ilk notlarından kədər hiss etdirən gözəl mahnıdır. 

Təbii olaraq qrupun ən son və ən sevilən mahnısını sona saxladım. Qrupun son ifa etdiyi mahnı həm də onları tanımayanlara da tanıdan bir mahnıdır. Əvvəlcədən haqqında qeyd etdiyim "Ey Gözəl" mahnısıdır.  "Babamızın babasının babası" filmini izləməyən varsa məncə izləsin. 

The half qrupu konsertə bir rock konserti havası qatmışdı. Belə ki sakitcə oturub dinlədiyim konsertin yarısında artıq ayaqüstə idik. Tam da rock dinləyicisi və rock konserti kimi. 
The Half-dan sonra isə "East or West" qrupu çıxış etdi. Bu qrup daha çox milli və xarici mahnıları mix-i  və ya xarici populyar mahnıların milli alətlərimizlə ifası ilə seçilir. 
Konsert haqqında daha çox yazmaq istərdim amma təəssüf ki, saat 9-10 radələrində artıq yolu nəzərə alıb, konsert yerini tərk etməli oldum. Fikrimsə sonra çıxış edəcək "Ahmedovski trio" (qrupu dinləmək üçün adına klikləmək yetər)  və "Free from Four" qruplarında qaldı. Gözəl mahnı, qrup, konsert vaxtı musiqiylə bağlı hər cür fikrinizi, məlumatınızı bölüşün. Rəylər (comment/yorum) bölməsi bunun üçündür. Sona qədər oxuduğunuz üçün təşəkkür edirəm.

Sofar Sounds

Sofar Baku.

Arzuladığım konsert.

  İnsanları o qədər müxtəlif səbəblərdən bölürük ki, bunlardan biri də konsert və musiqiyə olan münasibətləridir. Bəzi insanlar konsert zaman ucadan mahnını ifaçı ilə oxumağı, dostları ilə musiqi haqqında dinləyərkən söhbət etməyi sevir. Ancaq digərləri musiqi başladığı andan sadəcə dinləmək və o an sadəcə musiqini düşünmək, yanında kimin olduğunu belə düşünmədən məhz həmin an yalnız musiqidən zövq  almağa üstünlük verir. Məncə artıq 2. tip insan olduğumu təxmin etdiniz. Sofar məhz belə insanlar üçündür. SOFAR- Songs From A Room. (Bir Otaqdan Gələn Mahnılar)

  Qısaca yaranma tarixinə baxsaq: 2009-cu il Londonda Rocky Start, Rafe Offer, Dave Alexander (Roki Start, Reyf Ofə, Deyv Aleksandr) tərəfindən qurulub. Onlar bir Friendly Fires konsertində ucadan danışanlar, içki şüşələrinin bir-birinə vurulma səsi və insanların mobil telefonlarına baxmalarından qıcıqlanıb və narahat olublar. Bundan sonra ilk Sofar konserti baş tutub. İlk olaraq özləri Aleksnadrın Londondakı mənzilində 5 mahnı ifa edib. Dinləyicilər isə yalnız yaxın 8 dost olub. Ancaq 2. konsertə daha çox insan gəlib. Sofar əsasən ağızdan ağıza məhşurlaşıb. 

Artıq Sofar 400-dən çox şəhərdə keçirilir. Sofarı fərqləndirən əsas bir neçə səbəb var. Bura gələn ifaçılar, qruplar əsasən elə həmin vaxtlar elə də məhşur olmur. İnsanları daha çox cəzb edən isə konsertin yeri və çıxış edəcək performerlərin adının yalnız 1gün əvvəl elan olunmasıdır. Konsertdə iştirak üçün isə siz Sofar-ın rəsmi saytından qeydiyyatdan keçməlisiniz. Ancaq bu kifayət deyil. Bundan sonrası bir az şans işidir. Belə ki qeydiyyatdan keçənlər arasından təsadüfi yolla konsertdə iştirak edəcək şəxslərə elektron poçt ünvanlarına (mail) seçildikləri, konsertin yeri və performerlərin adı olan mesaj gəlir. Konsertlərin təşkilində iştirak edənlər əsasən könüllülər olur. Konsert əsasən ödənişli olur. Bu ödəniş isə konsertin keçirilməsi (baş tutması) üçün xərclənir. Sofar UK(Birləşmiş Krallıq) və İrlandiyada konsertlərində bəzi məhşur, sevilən ifaçıların çıxışı da baş tutub. Bunlara James Bay, Hozier, Emeli Sandé, Will Young, Tom Odell, Shura, Benjamin Clementine, aktyor Robert Pattinson, Wolf Alice, Bastille və Lianne La Havas aiddir. Yazdıqlarım arasında xüsusilə James Bay, Hozier (hər 2 müğənninin Sofar çıxışlarını dinləmək üçün sadəcə adlarına klikləmək yetər) , Tom Odell dinləyən və sevən biri olaraq həmin konsertlərin necə gözəl olduğunu təsəvvür edə bilirəm. Əsasən konsertlərdə dinləyici normal konsertdəkindən az olur. İnsanda sanki dostlarıyla canlı musiqi dinlədiyi doğma bir yerdəymiş kimi bir hiss yaşadır. Sofar konsertləri ayda ən azı 1dəfə keçirilir. Sofar konsertlərini fərqli edən həm də konsertin keçirilmə yeridir. Belə ki, konsert ağlınıza gələn hər yerdə keçirilə bilir. Bu kiçik bir otaq, hansısa evin damı və ya adi bir geyim magazası belə ola bilər. Sonra konsertlər Sofar-ın youtube kanalına yerləşdirilir. Bu da o deməkdir ki, siz müxtəlif şəhərlərdən heç tanımadığınız bəlkə də, en sevdiyiniz olacaq ifaçını dinləmə imkanına sahibsiniz. 
SofarBaku/ Sofar Bakı. 2016-cı ildən fəaliyyət göstərir. Sofar Bakının rəhbəri Rəşad Nəzərlidir. 

Sofarın rəsmi vebsaytı: https://www.sofarsounds.com 
Rəsmi instaqram səhifəsi və hər şəhərin rəsmi Sofar instaqram hesabı mövcuddur. 
Növbəti yazım SofarBakı-nın son konserti haqda olacaq. Həmin konsertdə mən də dinləyici idim. Buna görə də xüsusilə fikirlərimi məhz o yazıda sizinlə bölüəşəcəm.
Sofar ifaçılarını diqqətlə dinləyin. Kim bilir gələcəkdə nə baş verəcək. Bəziləri xatirələrə çevrilir, Bəziləri əfsanəyə.

The Best Hit

Koreya Draması.

İngiliscə adı: The Best Hit.

Azərbaycanca adı: Ən Yaxşı Hit.

Hangul(koreyaca): 최고의 한방.

Rejissor:  Yoo Ho-Jin, Cha Tae-Hyun.

Yayımlandığı Kanal: KBS2.

Janr: Gənclik, komediya, romantizm.

Bölüm sayı: 32

Dil: Kreya dili( Hangul)

Yayımlandığı ölkə: Cənubi Koreya.

Serialın yayım ili: İyun 2 - İyul 22, 2017.

Serialın 1 bölümü 35dəqiqə davam edir. Bu da serialın daha axıcı olmasına və tez bitməsinə gətirib çıxarır. Yəni 32 deyil də 16 bölümlük bir serial kimi qəbul edə bilərsiniz. Serialın hər iki rejissorunun ilk işidir. Ilk iş olsa da çox keyfiyyətli alınıb. Rejissorlardan Cha Tae-Hyun həm də aktyordur və bu serialda da əsas rollardan birini canlandırır. Serialı çox bəyəndim. Serial çox əyləncəlidir və bolca güldürür. Mənim kimi serialları sona kimi izləməyə səbri çatmayan biri sona qədər heç həvəsini itirmədən izləyib. Tam yayda izlənəcək drama tapmışam. Serialda ən sevdiyim isə baş rol anlayışı demək olar yox idi. Hər kəsə güldüm və hər kəsi bəyəndim. Daha aydın desəm serial o qədər gözəldir ki, pis insan anlayışı demək olar sıfırdır. Koreya dramalarında bunu bir neçə dəfə görmüşəm. Pis insan yoxdur. Yalnız sizə pis tərəfi görünüb. Tərəddüd etmədən izləyin!

J2 

Mövzusu: 1993-cü ildə Jay-2 qrupunun məşhur solisti Yoo Hyun-Jae məşhurluğunun ən zirvəsində olan bir mügənnidir.

 O səsi, rəqs qabiliyyəti və dəblə geyimi ilə seçilir. Tufanlı bir gündə isə o işlədiyi səsyazma studiyasının damından pilləkanla aşağıya yıxılır. Və budur, o artıq 2017-ci ildədir. Onu 2017-ci ildə az qala maşınla vuracaq olan 3gənc isə onun gələcək həyatında böyük yer tutacaq. 2017-ci ildə isə onun keçmişdən yaxşı tanıdığı meneceri və işlədiyi şirkətin Ceosu ilə eyni yerdə yaşamalı olacaq. Ən pisi isə o burada öyrənir ki 1il sonra 1994-cü ildə yoxa çıxacaq və ölü qəbul ediləcəkdi. 90-cı illərin geyimi və tərzi ilə özünü hələ də məhşur 

hesab edən Hyun Jaenin heç kimin onu tanımadığı dünyaya alışması çox çətin olacaq. İlk ağlına gələn keçmişdən tanıdığı insanları axtarmaq olacaq. Əslində keçmişdən tanıdığı insanların xatirəsində o heç də yaxşı insan kimi qalmayıb. Hyun Jae onların həyatında nə dəyişikliyə səbəb olacaq? Öz itkin düşməsiylə bağlı əsas günahkar kimdir? Suallar çoxdur, ancaq serial əsas şübhəlini tap havasında deyil. Yəni daha çox əyləncəli tərzdədir. 
90lardan bizim dövrə düşən insanın telefonla tanışlığı və telefona sevgisi xüsusilə maraqlı və izləyicini güldürən tipdə idi. 
Hyun Jae nin gəldiyi dünyada ən qəribəsi onun keçmişdəki meneceri, məşhur müğənni dövründə gözəlliyinə görə pəri adlandırılan qadın və yaşlı işlədiyi şirkətin müdiri birlikdə yaşayırlar. Hər şeyi qarışıq edəndə budur.

Yoo Hyun-Jae rolundakı aktyor Yoon Si-Yoon -dur. Bu aktyoru əvvəldən tanıyırdım. Bu serialda ikiqat sevdim. 31 yaşındakı bir insan 23 yaşlı gənc rolunu oynayır və mən onu izləyəndə daha az yaş verirdim. (Koreyalılar nə yeyib içir yaşlanmır;) 


Choi Woo-Seung- bu rolu Lee Se-Young oynayır. Məmur olmaq üçün imtahana hazırlaşan şanssız qız. Hər cür yarı zamanlı işdə çalışaraq yaşayan qız. 

Bir də onunla bağlı ilk bölümlərdə serialda Lee Kwang-Soo rol alıb. Bu aktyor nə oynasa baxa bilərəm. Xüsusilə də komik obrazdırsa daha gözəl olur. 

Lee Deok-Hwa, Hong Kyung Min and Chae Tae Hyun.

Cha Tae-Hyun- Lee Gwang-Jae  rolundadır. Hyun Jae-nin meneceri. Birlikdə yaşayan qəribə ailənin rəisidir. Belə etibarlı insana az-az rast gəlmək olar.

Hong Kyung-Min- Park Young-Jae obrazındadır. 90-cı illərdə itkin düşən Yoo Hyun Jae ilə məşhur J2 qrupunda olan digər müğənnidir. Günümüzdə isə o məhşur Əyləncə şirkətinin (Star Punch Entertainment company) seo(ceo)-sudur. 

Taeyang kimi t-shirt ün kəşfindən xəbərsiz, deməli bu onlarda genetikdir. 

Ən sevdiyim obrazlardan biri isə MC Drill(Dong Hyun-Bae) oldu. Serialda Lee Ji Hoon  -un yaxın dostudur. Onlar əyləncə şirkətində  stajyerdirlər və müğənni(reper) kimi çıxış etmək üçün şans gözləyirlər. Mənim üçün ən yadda qalan obrazlardan oldu. Dramadan ən çox 2aktyoru xüsusilə bəyəndimsə onlardan biridir. Serialda ilk gördüyünüz andan sizə tanış üzü ilə də yadınızda qalacaq. 
İlk baxışdan Bigbang qrupunun solisti Taeyang a çox bənzəyir. İstər saç düzümü, istər görünüşü ilk ağlınıza Taeyang-ı salacaq. 

 Amma daha qəribəsi əslində elə Taeyang-ın böyük qardaşı olmasıdır. (qeyd bloga yazı yazarkən öyrəndim. 1az araşdırma həmişə yaxşı nəticə verir.) Dong Hyun-Bae aktyor roluna uyğun olaraq dramaya rəng qatır. Süni görnmür. Əsas rol deyil ancaq yadda qalan olacaq. Əlavə qeyd edim ki, gənc qardaşının çox məhşur olması ona həmişə daha məsuliyyətli olma hissi veridiyi barəsində o özü etiraf edib.

Kim Min-Jae- Lee Ji Hoon rolundadır. Anası 90-larda məşhşur pəri ləqəbli müğənni olub. Ailəsindən gizli stajyerlik edir. Arzusu müğənni olmaqdır. Ailəsi onun məmurlu imtahanı üçün hazırlığa getdiyini zənn edir. Aktyor qalın səs tonuyla seçilir. Onu əsasən tarixi film və seriallarda daha çox görürük. 

Aktyorlar içində "Astro" qrupundan Cha Eun-Woo isə məşhur müğənni rolundadır. Onun haqqında sadəcə bir şey qeyd edim, həqiqətən də qəribə cazibəsi olan yaraşıqlı aktyor/müğənnidir. Bu adama tezliklə bir vampir rolu təklif edilsin. Yəgin ki soyuq havasina görə onu aktyor Ahn Jae-hyun-a bənzətdim.

Da Bong - serial bitəndə ən yadda qalan məhz bu olacaq. Serialdan sizə həm də gözəl mahnılar qalacaq. T-ara dan My love mahnısı.

Kim Min Jae nin repini də eşitmək xoş olar.

 Bu da digər sevdiyim mahnı. 

Tam yayda izlənəcək bir drama tapmışam. Serialın mövzusunu daha çox öyrənməyə çalışmayın izləyin, belə daha maraqlı olacaq. Seriala bir az da rəng qatmaq üçün əlavələr olduğu üçün bölümləri tam sona qədər izləyin. Hətta J2 üçün klip belə var. 90lar havasında klip maraqlı alınıb. Bu arada J2 qrupun hər 2 üzvünün də eyni adda olmasıyla bağlı verilmiş addır. Sonu haqqında yalnız bunu mütləq deməliyəm. İstədiyim və gözlədiyim hər şey oldu ama istəmədiyim də oldu. Belə deyim 2 seçim var idi və hər 2sini seçə biliblər.