Orijinaldan daha yaxşı Cover. Volume 1

Həmişə ilklər ən gözəl olmur.


  Biz həmişə orjinalların ən gözəli olduğunu düşünmüşük. İstər kitab baxımından, istər film və ya mahnı olsun. Ancaq bəzən bir mahnının coverini eşitdiyin zaman mahnıda orjinaldan fərqli, sanki tam başqa yeni bir şey tapırsan. Sanki orjinal olmasaydı, orjinalı eşitməsən, bu cover deyil deyəcəksənmiş kimi hiss etdirir. Cover mahnının orjinalını kölgədə belə qoya bilir. 
Bu cover üzərində işləyən insanların istedadından asılıdır. Orjinalı sevilən mahnını cover etmək xüsusi bacarıqdan əlavə həm də güclü duyumu və hissləri birləşdirib musiqini korlamadan dəyişməkdir, ona özündən nəsə qatmaqdır. Gəlin mənim sevdiyim mənə təsir etməyi bacaran mahnı coverlərini(kavrlar) və orjinallarını dinləyib müqayisə edək.
1.  İlk olaraq The NBHD( Neighbourhood-un qısa forması) dən bir cover seçdim. İlk dinlədiyim zaman cover olduğunu bilmirdim və öyrənən kimi orjinalını da axtarıb tapdım. Ancaq bu versiyanın yeri tam başqadır. Əslində The NBHD mahnının mashup  formasını yaradıb. Mashup- mahnıları birləşdirib yeni 1 şey yaratmaq. "Cry me a river/ Say my name" .  Destiny's child  qrupunun səsləndirdiyi versiyanı/"Say my name"  (Bilməyənlər üçün Destiny's Child qrupunun əsas ifaçısı Beyoncé olub və məhz bu qrupda məşhurlaşıb.)və Justin Timberlake-in "Cry me a river" mahnısını qarısdırıb yeni və sevdiyim bir mahnı çıxaran The NBHD qrupu həm də mənim kimi araşdırmağı sevən insanların bu iki mahnını xatırlaması və ya bu mahnıları da ilk dəfə üçün dinləməsinə şərait yaratdı. 

2. "Eyes, Nose, Lips" mahnısına Epik High-dan Tablo-nun cover/kavr-ı da mükəmməllər içindədir. Həm əsas versiyanı və həm də bu versiyanı dinləməyi məsləhət görürəm. Qeyd edim ki mahnının ifaçısı Bigbang qrupundan Taeyang-dır və Tablonun rep cover/kavr-ında da yenə Taeynag mahnını səsləndirir. 

3. Jeff Buckley "Calling you". Bu mahnı və Jeffin Cover-i haqda Jeff Buckley haqqında yazdığım yazını oxusanız məlumat ala biləcəksiniz.  

                                    

4. Mad World - Jasmine Thompson. Mahnının orjinal versiyasını Gary Jules ifa edib. Mən hər iki versiyanı da çox sevirəm. 

                                 

5. Wicked Games Charlotte Cardin. Mahnı XX əsrin mahnısıdır. Əsas ifaçısının adını bəlkə eşitməmisiniz ancaq bu mahnınıəminəm ki eşitmisiniz. Həm də məhz onun- Chris İsaak in ifasında eşitmisiniz. (İfaçının adını klikləyərək orjinalı dinləyin)

                           

6. Unlike Pluto - No Scrubs ft. Joanna Jones. Mahnının orjinalı yenə XX əsrin mahnısının cover-idir. Amerika qrupu TCL (mahnının orjinalı üçün qrupun adını klikləyin) No scrubs mahnısını eşitsəm açığı bəyənməzdim. Amma cover-i sevdim. 

Bu arada ən möhtəşəmi ən sona saxladım. Sona qədər dinləyin hər mahnını. 
7. Taka (One Ok Rock qrupunun solisti) - Hello. One Ok Rock mənim çox sevdiyim yapon rok qrupudur. One Ok Rock qrupuna şans vermək istəyən oxucu qrupun adına klikləyərək sevimli qrupum haqda məlumat və əsası ən sevdiyim mahnılarını dinləyin. 
Qrupun solisti Taka məşhur müğənni Adele-in Hello mahnısını çox gözəl oxuyub. 

8. Ən sona ən əfsanı mahnını saxladım. (təbii ki mənim üçün) Mahnını yaxşıca araşdırdığım zaman çox təəccüblənmişdim. Orjinal və indiki versiya arasında yeganə ortaq cəhət sanki mahnının sözləridir. Əvvəla qeyd edim ki Mr. Sandman- əsasən nağıllarda istifadə olunan sehrli obraz olub. Adının mənasında qumadam olmasının səbəbi isə gözə sehrli qum töküb insana şirin, sehrli yuxu verməsinə inanılmasıdır. Mahnının ilk versiyası  Vaughn Monroe tərəfindən ifa edilib. Ardınca eyni ildə  The Chordettes qrupu da ifa edib. (xüsusuilə bu versiyanı bəyənmirəm. Zövqlər müxtəlifdir ;)) Hər iki versiya üçün ifaçı/qrupun adını klikləyin.  Mahnının yaşı da az deyil. mahnı 1954-cü ilin mahnısıdır. Mənim adına uyğun sehrini hiss etdiyim versiyanı isə SYML ifa edib. 

Mahnını dinləyəndə real dünyanı unuduram. Belə hiss etdirə bilən musiqi çox azdır. Ən sevdiyim mahnını da sizilə bölüşdüm, daha nə istəyirsiz ki . Musiqidən zövq alın ;) 

Utopya

Yaxşı ilə pisin arasında.

   Siz çox eqoistsiniz. Dünyanın gözəl yer olduğunu düşünürsünüz. Siz nəyisə dəyişdiyinizi nəyisə yaxşılığa dəyişdiyinizi düşünürsünüz. Amma hardasa bir kənddə bəlkə də dünyanın ən ağıllı adamı doğulub ve o kənddə məktəb olmadığı üçün ömrünü adi kənd sakini kimi ordaca başa vuracaq. Bəlkə də sizin o çox sevdiyiniz ən sevdiyiniz müğənninin səsindən qat qat gözəl səsi olan insan hal hazırda tam fərqli bir işdə vaxt öldürür və biz o səsdən, o beyindən məhrum olmuşuq. Hardasa dünyanın ən gözəl qızı da var amma o heç vaxt gözəllik yarışmasına qatılmayıb. Boş verin gördükləriniz ƏNləri. Ən ağıllı olan, ya ən güclü olan yoxdur.  Sadəcə düzgün anda düzgün yerdə olan  o yerçün ən düzgün insan var. Onu da bacara bilsəniz. Və bəlkə də siz ömrünüzün sonuna kimi heç vaxt sizin üçün olan düzgün yeri tapa bilməyəcəksiniz. Bəlkə də problem düzgün anı tapa bilməməkdədir. 
Sizin 1 nəfərə kömək etdiyiniz an əslində 10 nəfər itir gedir. İtkinin qarşısını ala bilərsiniz? Ümumiyyətlə həqiqətən mi, siz insanların, istisnasız hər kəsin yaxşı yaşamağını istəyirsiniz?  Siz sadəcə bunu istəmirsiniz. Insanların çoxu digərlərinə həqiqətən yaxşılıq etmək istəmir, sadəcə bizdə vicdan adlı hiss var ve bunu sakitləşdirməsək yaşamaq daha çətinləşər. Insanların çoxu dilənçiyə çörək, ya pul verməklə az qala 1 anlıq Cənnəti görmüş kimi hiss edir ya da qəhrəman kimi.  Digər insan isə o anda öz insanlıq borcunu yerinə yetirmişdir. Başqa bir insan isə o zaman özünü daha hörmətli, özünə arxayın hiss edib. Hər halda sonra hami öz həyatına geri qayidir. O dilənçini heç vaxt orda görməmiş kimi öz işiylə məşğul olur. Bəs dilənçi? O hələ də ordadir. Siz özünüzü yaxşi hiss edəsiniz deyə o hər gün orda durub dilənir. Bunu düşünmək bəlkə də sizə xoş təsir belə edə bilər. Axi dünyanın sizin, məhz sizin etrafinizda dönməsi hissini bir anliq düşünəndə belə yaşadiğiniz o sevinc sizinçün əvəzolunmazdir. Tanımadığınız bir yana siz heç tanıdığınız neçə nəfərə işiniz düşdü deyə yox bütün səmimiyyətinizlə sadəcə necə olduğunu necə yaşadığını bilməkçün yazmısınız? 
Belə bir çin atalar sözü var: 1 insana 1 balıq ver və sən onu 1 günlük yedizdirdin. Ona balıq tutmağı öyrət, və onu bir ömür yedirmiş ol. ( ümidvaram çincə yazacağımı düşünmədiniz).
   
 Aclığın qarşısını almağa çalışmırsız. Siz sadəcə ərzaq yardımı edərək yaxşı insan ola bilərsiniz.Sizin etdiyiniz kömək deyil siz özünüzə kömək etmişdiniz bütün ömrünüz boyu yalnız özünüz üçün yaşamısınız. Əsl kömək, problemi tam kökündən aradan qaldırmaqdır. Nəticəsi sizə ziyan gətirsə belə yaxşılıq edə bilərsiniz? Hətta maddi ziyana (milyonluq bir ziyan düşünün) gətirib çıxaracaqsa belə, siyasətçün, media üçün, etrafda yaxşi ad qazanmaqçün yox sirf istədiyinizçün yaxşılıq edin. Çalışın yaxşı ilə pisin arasında gedib gəlməyin. Yaxşı olmağa çalışın bir də baxacaqsınız artıq yaxsı insansınız. Dünya nə gözəl yerdir, nə də pis. Dünya çox qəribədir və onu daha çətin yaşanacaq vəziyyətə gətirməmək üçün özünüzü dəyişin. Bu yazınını sonunda sizdə nə dəyişdi?

Sing/İfa et/Oxu

Animasiya cizgi filmi.

Bu animasiya filmi izləməyə dəyər edən pozitiv olmasıdır və izlədiyiniz zaman əylənəcək, bol enerjili, xoş bir gün yaşayacaqsınız. Animasiyanın digər bir üstünlüyü isə orada qəhrəmanların oxuduğu mahnılardır. İzlədiyiniz zaman ən azı 1 sevdiyiniz mahnını eşitmək belə üzünüzdə təbəssümün səbəbi ola bilər. Hər janrda mahnı eşidə biləcəksiniz. Çünki bu mahnı yarışması haqqında olan animasiyadır. Bu animasiya filmi bizi yeni səslərin kəşfinə dəvət edir. Qeyd edim ki, filmdə məşhur ifaçıların  60-dan çox mahnısı oxunub. Bundan əlavə orijinal olaraq bu animasiya filmi üçün  Stevie Wonder və Ariana Grande "Faith"/"İnam" adlı mahnını duet şəklində ifa edib. Etiraf edim ki, mənim üçün filmdəki qəhrəmanların mahnıları daha xoşdur. 

Animasiyada hadisələr heyvanların dünyasında baş verir. Burada heyvanlar əslində sadəcə görünüşünə görə belədir. Yəni hər şey bizim dünyada baş verir sadəcə insanlar əvəzinə heyvanlar var. 

Bu aralar bu animasiya filmləri arasında insanlar yerinə heyvanların insan kimi davranması və qəhrəmanlar da daxil hər kəsin heyvanlar olaraq təsviri çox məşhurdur. Bu animasiya mənə özünü sevdirə bildi. Ailənizlə və ya dostlarınızla izləyə bilərsiniz.

 Animasiyamızda hər şey koala Buster Moon kiçikliyində atası ilə teatrda opera şousu izlədiyi zaman başlayır. 
Balaca Buster üçün səhnə, işıqlar gözqamaşdırıcı bir dünya kimi görünür və o həmin gündən artıq özünə yeni gələcək xəyalları qurur. Koala  Buster Moon artıq şou-biznesə qatılmaq arzusu ilə böyüyür və atasının köməyi ilə məhz o həmin məşhur teatr binasını ala bilir. Bir zamanlar insanların növbəyə girdiyi bu bina artıq heç də əvvəlki şöhrətinə uyğun deyil. 

Heç də hər şey xəyallardakı kimi olmur. Buster Moon borc içindədir və işçilərindən onun yanında yalnız yaşı 200-ü keçmiş 1 gözü taxma olan yaşlı kərtənkələ qadın var. (sizə də ilk oxuduğunuz zaman cümlədəki qadın sözü qəribə gəlsə də izləyəndə normal qəbul edəcəksiniz). Bank ondan aldığı krediti geri istəyir, əks təqdirdə onun teatr binasına əl qoyacaqlarını bildirirlər. Vəziyyəti düzəltmək məqsədilə isə kiçik koala öz varlı dostundan atasının özünün yeni səs yarışmasına sponsor olmasını istəyir. Koala bunun son şansı olduğunu anlayaraq sonda öz bütün olanını ortaya qoyur və nəticədə səs yarışmasının qalibinə 1000$ mükafat verməyi qərara alır. Ancaq katibəsi kərtənkələnin səhvi ucbatından elana 100.000$ mükafat veriləcəyi yazılır. Cəmi 1 neçə əlavə sıfır hər şeyi kökündən dəyişir. Hər şeydən xəbərsiz Buster Moon elanın verilməsindən 1 gün sonra binanın qarşısında uzanıb gedən böyük növbəni görəndə özünə inamı yenə də artır. Əlbəttə ki, Buster Moon mükafatın həcmindən xəbərsiz olduğu üçün əvvəlcə buna təəccüblənir ancaq bəlkə də bu sadəcə oxumaq həvəsli insanlardır. Bəs həqiqəti öyrənəndə o nə edəcək? 

 Bu qədər heyvanın gəldiyi yarışma isə çox əyləncəli iştirakçılar sayəsində bizə zövq verir. 

Ancaq digər tərəfdən isə bu yarışmaya həmişə gizli oxuma arzusu ilə yaşayan qəhrəmanlarımız da qoşulur. Hər biri hekayəyə ayrı rəng qatır. 

Animasiyanın səslənməsini də məşhur Hollywood aktyorları öz üzərinə götürüb. Bu da aktyorları sevən film həvəskarlarının diqqətini çəkmək üçün əla seçimdir. Gəlin əsas rolları səsləndirən aktyorları tanıyaq.
1.Matthew McConaughey koala Buster Moon rolu ilə.

2.Reese Witherspoon ev qadını donuz 25 uşaq anası (inanın) Rosita rolunu səsləndirib.

Rosita qarşımıza ümidsiz ev qadını kimi çıxır. 25 uşaqla başqa bir məşğuliyyət də mümkün olmur. Rozita tez-tez evdə gəncliyində necə gözəl səsi olduğunu desə də uşaqları ona gülür və yoldaşı da onun sözünü dəstəkləmir. 

Bu onun üçün ümidsizliyə qapılmaq idi. Ancaq o nəhayət həmin səs yarışmasının elanını görür və içində yenidən bir ümid doğur. Lakin onun 25 uşağını qoyacağı bir dayə yoxdur. Bəli heç bir dayə 25 uşağa baxmaq istəmir. Bəs Rozita nə edəcək? Mənim ən sevdiyim ikinci qəhrəmanımız məhz Rozita idi. Rozita kimi 25 uşağı olmasa da 😄,😆dünyanın hər yerində özünü onun kimi arzularını bir kənara qoyub uşaqlarına baxan və gəncliyindən və arzularından 1 işıq ili qədər uzaq hiss edən ev qadınları yetərincə çoxdur. 

3. Kirpi Ash obrazını isə Scarlett Johansson səsləndirib. 

Ash punk rock/rok musiqi ifaçısıdır. O yeniyetmədir və yaxşı gitara çalmağı bacarır. Yarışmaya öz sevgilisi ilə gəlib. Bu yarışma yeniyətməyə nə verəcək? Onun həyatını hansı yeniliklər gətirəcək? 

4. Tori Kelly isə fil Meena (Mina) obrazını səsləndirib. 

Mina isə səhnə qorxusu olan gəncdir. O sadəcə gözlərini yumanda və ya tək olanda oxuya bilir. Çox gözəl səsi olsa da bunu ailəsindən başqa heç kim bilmir. Ailəsində ən çox onun müğənni olmasını babası istəyir. Amma onun üçün hər şey elə də asan olmayacaq.

5. Seth MacFarlane isə yadda qalan obrazlardan olan siçan Mike(Mayk)-ı səsləndirir. Mayk özündən çox razıdır. 

Buradakı çoxun dərəcsini isə siz animasiyanı izlədiyiniz zaman biləcəksiniz. Ancaq Maykın özündən razılığına baxmayaraq onun çox gözəl səsi sizi keçmiş jaz havasına qaytaracaq. O həm də gözəl saksafon ifa edir. Siçanın səsi özünə görə çoox böyükdür. 

6. John C. Reilly isə varlı ailənin tək övladı  qoyun Eddie obrazını səsləndirir. Edie hər şeyi olsa da həyatda onu maraqlandıran heç nə yoxdur. Buster Moon un ən yaxın və yeganə dostudur. Eyni zamanda onun nənəsi Busterin uşaqlıq xəyallarının əsas səbəbkarı  Nana Noodleman-dır. 

 Nana Noodleman obrazını isə 2 fərqli aktrisa səsləndirib. Gənc Nana nı Jennifer Hudson, yaşlı Nananı isə Jennifer Saunders səsləndirib. Burada hər iki aktrisanın adının eyni olması diqqətimi çəkdi.

7. Nick Kroll şou yönümlü rəqs sevgisi ilə seçilən donuz Gunter obrazını səsləndirir. O həmişə şən donuzdur və onun pozitivliyi sizə də keçəcək. Rozitanın səhnə partneri olur. 

Ən sevdiyim obrazı və səsi sona saxladım. Təbii ki bu uzun yazının sonuna qədər gələ bilmisinizsə sizi təbrik edirəm. 😎

8. Taron Egerton isə yeniyetmə qorilla  Johnny/Coni obrazını səsləndirir. 

Qorillanı animasiyada karizmatik göstərməyi bacarıblar! Səsi isə insanı heç yormur. Şirin səsi ilə mən ən çox onu bəyəndim. Coninin problemi isə odur ki, onun atası oğru dəstəsinin lideridir və öz oğlunu gələckdə bu dəstənin yeni lideri etmək istəyir. Belə bir ata üçün oğlunun müğənni olması mümkün belə deyil. 

Bu animasiyanı izləməyi hər birinizə tövsiyə edirəm. İndi isə ən sevdiyim mahnıları sizinlə bölüşüm. İlk olaraq animasiyada çox kiçik 1dəqiqəlik bir zümzümə şəklində eşidəcəyiniz mahnını dinləyin.

Bundan sonra İsə animasiyadan sonra dilimə düşən və çox sevdiyim digər bir mahnı və yenə də taron Egerton un ifasında. 

Animasiyadan olan digər mahnıların videolarını isə paylaşmıram. Çünki belədə filmin dadı, duzu qaçar. İzləyərək spoi-siz dinləmək ən gözəlidir. 

Sonda Buster Moon teatr binasının əvvəlki məşhurluğunu qaytara biləcəkmi? Bu arada animasiya filmində ən az sevəcəyiniz və hərəkətlərinə görə bəzən yanınızda olsun deyə düşünəcəyiniz isə o kiçik siçan Mike/Mayk olacaq. 

Musiqinin eşidilməsi və sevilməsi üçün bəzən çox bir şeyə ehtiyac olmur. Böyük dekorlar, möhtəşəm səhnəyə ehtiyac yoxdur. Sadəcə 1 səhnə və səni qaranlıqda aya çevirən işıq yetər. Geriyə isə səsin və bacarığınla parlamaq qalır. -Koala Buster Moon-un yox mənim fikrimdir. Siz də aşağıda rəy bildirməyi unutmayın.

Sən

HƏR ŞEY SƏN'DƏN BAŞLAYIR.

  Suallara boğun bəzən özünüzü. Niyə? sualı həyatda ən çox haqqında düşündüyümüz sualdır, deyil mi? Gəlin başlayaq.

  Mən anlamıram. İnsanlar niyə bezmir. niyə eyni yerlərə gedirlər. Niyə həmişə harasa bağlı qalırlar. Niyə dəyişmirlər. Geyim və yemək üçün yaşayırıq. - bunu qəbul edin əvvəl. Sonra nə isə etmək haqqında düşünün. Əvvəl olduğunuz formanı qəbul etmək lazımdır. İnsanlar üçün necə də xoşdur, məqsədini övladına bağlamaq. Buna mən sadəcə bəhanə kimi baxıram. Ona verməyə çalışdığını əvvəl özün yaşamalısan. Bacararsan? Cəhd etmisən? Bu cümləni isə bu mənada daha dərindən anlamaq olur. 

Ya olduğunu kimi görün

Ya göründüyün kimi ol.

Mövlana.

Mən göründüyünüz kimi olmağınızı istəyərdim. Çünki haqqında danışdığınız özünüz  o qədər dürüstdür, mehribandır. Necə gözəl görünür sözlər o anlarda ağzından çıxanda, elə adam var kim olduğunu bilməsəm inanardım. Atın bu ikililiyin daşını. Yorğun olarsınız bəsdir hər şeyi cəmiyyətin, dünyanın, sistemin boynuna atdınız. Etməliyəm deyə bir şey yoxdur. Danışdığınız o cəmiyyət, dünya, sistem hər biriniz (hər birimiz) ilə bir bütün olub. Dəyişin. Danışmazdan əvvəl həmişə göründüyünüz kimi olduğunuza əmin olun. 

Bəzən və çox vaxt uşaq kimi olun. Təmiz və olmalı olduğumuz kimi. Dünya səni dəyişməsin. Çünki yolun ən sonunda anlayacaqsan ki, səni dəyişən dünya, ya nifrət etdiyin onlar deyil, SƏN və sənin SEÇİMlərindir. Daha yaxşı olmaq seçimlər arasında yoxdursa daha pis olmağı seçmə. Biz hamımız müəyyən mənada yaxşı insanıq və eyni zamanda pis insanıq. Bu cümlələr tək sənə, ya sizə ya mənə aid deyil. Bizim hamımıza aiddir. Şablonu sevmirəm, Ümidvaram şablon olmadı. fikirləriniz hər zaman maraqlıdır.

Bu arada, bu yazı üçün şəkil seçərkən, 13 Reasons Why- adlı serial diqqətimi çəkdi. Treyler maraqlı gəldi. Baxanlar fikir bildirsin ki, mən izləsəm haqqında burda yazı yaza bilim. Amma sadəcə seriala baxıb fikriniz dəyişməyin, yazının yazılma səbəbini düşünün. Uzun, yorucu işə qrafikinizə baxmayaraq düşünməyi unutmayın. Bizi robotdan fərqləndirən budur. Bu bacarığımızı inkişaf etdirək. Düşünməyi yadırğamayın. Özünüzə yaxşı baxın. Blogger dostlarımın yadında olmaq belə yazmaq üçün əla motivasiyadır. 

Bu aralar mən.

Son Zamanlar..

  Salam. Nəhayət çox uzun zamandan sonra bura yazmağın sevincini təsəvvür edin. Vaxt azlığı və yorğunluq bu il hər zamankından daha çox üstün gəlib. Bu aralar mən də yox kimiyəm. Çünki sevdiyin kitabı oxumağa vaxt tapmamaq, izləmək istədiyin fimlərə sadəcə uzaqdan baxmaq və blogunda nə yazacağını düşünüb də yaza bilməmək bu sıranı uzada da bilərəm, bütün bunlardır məni mən edən. 

Və bir neçə aydır onlardan uzağam. Məncə, vəziyyətin necə olduğunu siz anladınız. Bir də hər şeyin üstünə mövsümə uyğun qrip əlavə edək. Nəticə "möhtəşəm" olur. 

Bu aralar hər şeydən çox qripəm. Artıq qripi hardan, kimdən tutduğumu da bilmirəm. Bu ilki qədər qrip tutduğum olmamışdı. Bloqa yazılacaq qədər həyatıma daxil olmuş qrip virusu düşünün. 

Ancaq bütün bunlara baxmayaraq pozitiv yaşamağa davam edək. Məsələn saçlarımı qısaltmaq kimi bir dəyişiklik istəyirəm. İndi upuzun saçlı qız olduğumu düşünməyin sadəcə bir az çox uzanıb. Kəsilmə vaxtı gəlib çoxdan. Qısa saçları çox sevdiyimi desəm təəccüblənməzsiniz. Havaların isinəcəyi vaxtı hər ildən daha çox gözləmək səbəblərim içində saçlarım da ən öndən özünə yer tutub. Qalın geyimlərdən bezdim artıq, hava soyuqdursa bir az da geyim olaraq istədiyin rahatlığı tapmırsan. Mən tez üşüyən olduğumçün ikiqat problem olur. Aşağıdakı şəkildəki kimi görünən qız görsəz o mənəm əmin olun. 

Gözəl mahnılar dinləməyə vaxt çatdıra bilirəm. Qulaqcıqlarım yolda ən yaxın dostum olur. Qış sevən insan necə qışın tez getməsini istəyir? Qarışıq hislər deyək. Ya da Bakıda qış o qədər də qarlı olmur deyədir. Deməli hər şeyin səbəbkarı ya soyuq ya da qripdir. 

Hava yaz olsun bir parkda oturum səssizliyə dalıb gedim istəyirəm. Son zamanlar istədiyim az küləkli (Bakıda çətin), azca meh əsən günəşin yandırmadığı xoş mülayim havadır. Bunu canlandırın təsəvvürünüzdə. Və tək oturub buludlara dalmaqdan zövq almaq. Günəşin batdığı vaxt olsa o an oralar bir başqa gözəl rənglərə boyanar. Sonra bütün gün dinləyin deyə bu mahnını da əlavə etdim. (Mahnı sözünü basın/klikləyin). Jeff (tanımayanlar adın üstünə klikləyin və haqqında yazdığım kiçikyazıya keçid alın, xüsusilə sevdiyim mahnılarını da sizlə bölüşdüyüm yazıdır.) havasında 1 mahnı sevənlər üçün bu mahnı.

Gününüz xoş keçsin. Bu da içimdən gəldi. 

Sizi siz edən şeylərdən uzaq qalmayın. Bu da bugünün tövsiyyəsi olsun. 

Yeni il yeni problem:Xidmətdən narazılıq

Papa John's pizza xatirəm.

Yeni il ərəfələri olduğu üçün hər birimiz ən azı bir dəfə şəhərə dostları ilə çıxmış olarıq. Və yenə də eyni səbəbdən şəhərdə sıxlıq ilə qarşılaşmışıq. Bu sıxlığın ən pis hiss olunduğu an isə yemək ya nə isə içmək üçün bir yer seçdiyimiz zaman olur. Problemim əslində tam olaraq sıxlıqla bağlı deyil. Xidmətlə bağlıdır. Belə ki, Papa John's pizza artiq mənim seçib məsləhət bildiyim yerlər arasından qalxdi. Səbəbsə sadədir. Təsəvvür edin ki tam da yer yoxdu dediyiniz an bir masa boşalır və həmin andaca normal olaraq yaxınlaşırsınız masaya əlbəttə ki oturmaq üçün. Ele bu vaxt ofisiant uzaqdan qışqırır ki (bəli tam olaraq uzaqdan qışqırır) sizdən əvvəldə artiq gözləyən var ve hemin masa onlarındır. Bu yerə ilk gəlişim deyil deyə bu təəccübləndirdi. Çünki belə növbə prosesi olmayib. Problemsə bundan ibarətdir ki, əvvəla bura gələn şəxslər belə sıra gözləməlidirsə nəyə görə bu əvvəldən bildirilmək əvəzinə ofisiantin düşüncəsiylə haqlı saydığı formada bir müştəri yerindən edilir. Və digərinə verilir. Əslində bunu problem etməzdim. Sadəcə normal qaydada ofisiant yaxınlaşıb bildirsəydi ki, artiq bizdən əvvəl gəlib yer gözləyənlər var. Ancaq bunun əvəzində isə ofisiant sadəcə uzaqdan bunu ətrafa elan verərək sizin yerinizdən durmağınızı istəyirsə bu artıq xidmət zəifliyidir. Bir müştəri üçün kobud hərəkət edərək müştərinin gözlədiyi masani onunçün tapıb! hazirladi ancaq digər bir müştərini həmişəlik itirdi. Həm də nəzərə alsaq ki, bu hadisənin şahidi digər müştərilər də oldu. Əmin ola bilərsiniz ki onlar tərəfindən də bu hal xoş qarşılanmadı. Mən sırf bu halın günümü bərbad etməməsi üçün təbii olaraq oranı tərk etdim. Mənimçün o an vaxt önəmli olduğu üçün çıxıb basqa yerdə pizzamizi yedik. Anlamadığım budur ki, insanlara deyəsən elə gəlir ki, yalniz keyfiyyətli yemək müştəri məmnuniyyətinin başlıca səbəbi ola bilər. Halbuki ən ilkin şərt xidmət və gülərüz işçilər olmalidir. Müştəri ən əvvəl özünə hörmət və xüsusi diqqət gözləyir. Bunun tam tərsini gördüyü yerdə isə qalmir. Bu həmin yerin imicinə mənfi təsir edir. Ən azi ona görə ki bir müştərini itirdiyiniz zaman onun ətrafina da bu təsir edir. Bir sözlə sevdiklərimə, dostlarıma artiq oranı məsləhət görmürəm. Siz də bənzər xidmət zəifliyi ilə bağli narazı olduğunuz və ya indi ağlınıza gələn rastalşdığınız bu kimi situasiyani rəy/comment/yorum kimi paylaşsaniz sevinərəm. ☺